Leikskólinn Mánagarður var stofnaður 9. september 1996 og hefur Félagsstofnun stúdenta rekið hann frá upphafi samkvæmt þjónustusamningi við Reykjavíkurborg.

Mánagarður er sjö deilda leikskóli fyrir börn á aldrinum eins til sex ára. Deildirnar eru aldursskiptar og skiptist leikskólinn í yngri barna álmu og eldri barna álmu.

Í Mánagarði leggjum við áherslu á að skapa hlýlegt, öruggt og hvetjandi umhverfi þar sem börn fá að njóta sín, leika, læra og þroskast á eigin forsendum. Starfið byggir á virku námi, jákvæðum samskiptum og virðingu fyrir hverju barni.

Leikskólinn vinnur eftir HighScope-uppeldis- og menntastefnunni þar sem lögð er áhersla á að börn séu virkir þátttakendur í eigin námi. Börnin fá tækifæri til að velja, rannsaka, prófa sig áfram, taka ákvarðanir og hafa áhrif á eigið nám og daglegt starf.

Fyrirsjáanlegt dagskipulag, gott námsumhverfi og náið samstarf starfsfólks og foreldra eru mikilvægir þættir í starfinu. Markmiðið er að hvert barn upplifi öryggi og tilheyri samfélagi leikskólans, fái tækifæri til að efla sjálfstæði sitt, frumkvæði og félagslega færni og njóti þess að læra í gegnum leik og eigin reynslu.